أخبار الآن | درعا – سوريا (براء عمر)

لأن الحرب لا تتوقف أثناء الأعياد، يستمر المقاتلون على الجبهات في تأدية مهامهم ومن أهمها الرباط على النقاط المهمة، كنعان الحموي مقاتل من مدينة حماة يقضي عيده الثامن على التوالي على الجبهات في مدينة درعا التي انشق فيها عن قوات النظام واصبح يقاتل في صفوف الجيش الحر . مزيد عن أجواء العيد على جبهات القتال في تقرير مراسلنا براء عمر.    

انا كنعان الحموي من مدينة حماة عايش بدرعا البلد مع شباب الجيش الحر رفقاتي وصرت واحد منهم,طبعا انا انشقيت من بداية الثورة عن الجيش النظامي ,يعني انشقيت من ما شفتو من ظلم وقهر وتعذيب, ونحنا هلا استقبلنا عيد الأضحى المبارك ,وهاد العيد الثامن يلي بحضرو وانا بعيد عن أهلي وبتمنى العيد الجاي ان شاء الله أكون بين أهلي وبعايد عليهن ان شاء الله .

في شباب صحابي قاتلو معي واستشهدو الله يرحمهم هضول رفقات سلاح مستحيل أنساهم وكل عيد بتذكرهم وبزور قبرهم ,أنا مبسوط بالعيد حتى لو انو انا هون عم برابط بدشمتي ,بس هاد مو عيدنا الحقيقي عيدنا الحقيقي لما تكون سوريا محررة.

انا حاليا مرابط بحي المنشية نفس الحي يلي انشقيت منو عن جيش النظام, بحب اعايد ع اهلي بمحافظة حماة وقلهن كل عام وأنتو بخير وان شاء الله العيد الجاي بتكون سوريا محررة ,
أعياد زمان كانت حلوة ألها بهجة وألها فرحة ونحنا هلا راضيين بقدر الله علينا وأن شاء الله بترجع أيام زمان وبترجع الناس تعيد مثل أول وأحسن.

شاركنا بمعارك درعا وحررنا مناطق واسعة وأن شاء الله راح نظل نشارك بمعارك لحتى نحرر درعا كلها وعالشام وحماة أن شاء الله، لأنو الشعب تعب كثير بكفي دم وشهداء من حق الشعب السوري يعيش مثل هالناس يلي عايشة.